Nabiyon Ke Halat (Hazrat Musa Part 1)

یہ کہانیاں جِنوں بھوتوں یا دیو پریوں کی کہانیاں نہیں ہیں۔ یہ انسانوں کی کہانیاں ہیں۔ جیتے جاگتے انسانوں کی سچی کہانیاں۔ اُن انسانوں کی کہانیاں جو ہماری تمہاری طرح اسی زمین پر آباد رہے۔ ان کہانیوں میں آپ کو دو قسم کے انسان ملیں گے: ایک، خدا کے فرمانبردار بندے، جو خود بھی نیکی کی راہ پر چلے، اور دوسروں کو بھی اُسی راہ پر چلانے کی کوشش کرتے رہے۔ جو شیطان کی چالوں سے ہر وقت چوکنے رہے اور اگر کبھی بھول چوک میں خدا کی نافرمانی کر بیٹھے تو اپنی غلطی معلوم ہونے پر فوراً اپنے رب کی طرف پلٹ آئے۔ اُنہی لوگوں کی بدولت ایمان کا نور پھیلا۔ اسلام کا چمن شاداب ہوا اور دنیا میں عدل و انصاف کا دَور دَورہ ہوا۔ دوسرے، گندے اور ناپاک انسان، جو خدا کی بندگی سے منہ موڑ کر شیطان کی راہ پر چلے اور جو لوگ خدا کے راستے پر چل رہے تھے انہیں بہکانے کی کوشش میں لگے رہے۔ اُنہی لوگوں کی وجہ سے دنیا میں بدکاریاں پھیلیں اور خدا کی زمین ظلم اور فساد سے بھر گئی۔ اُنہی کی نحوست سے دنیا والوں پر تباہی اور برباد آئی۔ ان کہانیوں کو پڑھنے کے بعد ٓپ کے سامنے یہ سوال آپ سے آپ آجائے گا کہ آپ اِن دو قسم کے انسانوں میں سے کن کے پیچھے چلیں۔آپ کی زندگی کے بنائو اور بگاڑ کا دار و مدار اِسی سوال کے جواب پر ہے۔ جو جیسا کرے گا ویسا بھرے گا۔ خدا کرے کہ آپ کی سمجھ بوجھ آپ کا ساتھ دے تاکہ آپ صحیح فیصلہ کرسکیں اور پھر اپنے فیصلے پر جمے رہیں۔